لاہور(۰۹ جولائی ۲۳ء) حال ہی میں سویڈن کے دارالحکومت اسٹاک ہوم کی مسجد کے باہر عید الاضحیٰ کے روز قرآن پاک کو نذرآتش کرنے کے گستاخانہ واقعہ کی پیش نظر، خانہ فرہنگ اسلامی جمہوریہ ایران لاہور  "کچھ ممالک کی جانب سے اسلامی مقدسات کی بے حرمتی کو معمول بنانے کی بنیاد کا تجزیہ" کے زیر عنوان، آنلائن مذمتی نشست کا اہتمام کیا. اس آنلائن مذمتی نشست میں لاہور میں ایران کے قونصل جنرل، محترم جناب مہران موحدفر؛ خانہ فرہنگ ایران لاہور کے ڈائریکٹر جنرل، محترم جناب جعفر روناس؛ چیئرمین پاکستان علماء کونسل، محترم جناب مولانا طاہر اشرفی؛ مکہ سعودی عرب سے سربراہ ادارہ منہاج الحسین لاہور، محترم جناب ڈاکٹر علامہ محمد حسین اکبر؛ باجوڑ سے نائب امیر جماعت اسلامی پاکستان، محترم جناب لیاقت بلوچ؛ امریکہ سے ریورنڈ نولکھا پریسبیٹیرین چرچ، محترم جناب پادری ڈاکٹر مجید ایبل؛ صدر متحدہ جمعیت اہل حدیث پاکستان اور چیئرمین البدر فاؤنڈیشن پاکستان، محترم جناب علامہ سید ضیاء اللہ شاہ بخاری؛ پرنسپل جامعہ نعیمیہ لاہور اور چیئرمین متحدہ علماء بورڈ پاکستان، محترم جناب علامہ ڈاکٹر راغب حسین نعیمی؛  پاکستان کے نامور کالم نگار صحافی،سیاسی  تجزیہ کار اور چیف ایڈیٹر روزنامہ پاکستان، محترم جناب مجیب الرحمن شامی؛ اور  انگلینڈ میں مقیم ماہر معاشیات، براڈکاسٹر اور سیاسی تجزیہ کار، محترم جناب شبیر رضوی نے بطور اسپیکرز شرکت کی.اس آنلائن نشست میں مقر رین نے حال ہی میں سویڈن کے دارالحکومت اسٹاک ہوم کی مسجد کے باہر عید الاضحیٰ کے روز قرآن پاک کو نذرآتش کرنے کے گستاخانہ اور گھناؤنے عمل کی شدید مذمت کی اور امت مسلمہ کو متحد ہوکر آئندہ کا لائحہ عمل تیار کرنے کی ضرورت پر زور دیا.

چیف ایڈیٹر روزنامہ پاکستان، محترم جناب مجیب الرحمن شامی کا کہنا تھا کہ " تمام اسلامی ممالک کو اجتماعی طور پر اسلامی مقدسات کی بے حرمتی کے اس تقویت پاتے عام رواج کے سد باب کے لیۓ متحد ہوکر ایک مشترکہ موقف اپنانا چاہیے کہ جو ممالک اس عمل کی پشت پناہی کریں ان کے ساتھ کیسا رویہ رکھنا چاہیے."

چیئرمین متحدہ علماء بورڈ پاکستان، محترم جناب علامہ ڈاکٹر راغب حسین نعیمی نے کہا کہ "ہم تمام اسلامی ممالک کو مل کر تنظیم تعاون اسلامی میں ایک قرارداد پیش کرنی چاہیۓ کہ جو ملک بھی ایسا شرمناک رویہ اپناۓ گا اس کے ساتھ تمام اسلامی ممالک کی جانب سے آیک ہے پالیسی اختیار کی جاۓ گی."

سربراہ ادارہ منہاج الحسین لاہور، محترم جناب ڈاکٹر علامہ محمد حسین اکبر نے کہا کہ :"اسلام دشمنوں کا حقیقی خوف قرآن پاک کی تعلیمات کا اثر ہے، کیونکہ کوئی بھی غیر متعصب شخص جب قرآن کا مطالعہ کرتا ہے تو اس کی تعلیمات سے متاثر ہوۓ بغیر نہیں رہ سکتا.  یہ بہترین موقع ہے کہ بین الاقوامی تنظیمیوں پر تمام آسمانی کتابوں کے تقدس کی حفاظت کے حوالے سے منظم قانون سازی کے لیۓ دباؤ ڈالا جاۓ.ڈاکٹر علامہ محمد حسین اکبر نے مسلمانوں کو بھی تاکید کرتے ہوۓ مزید کہا کہ " آگر دشمن ہمیں قرآن سے دور کرنا چاہتے ہیں تو ہمیں تعلیمات قرآن کو اور خوش اسلوبی سے اپنانا چاہیۓ تاکہ وہ اپنی گھناؤنی سازش میں ناکام ہو سکے."