خانہ فرہنگ اسلامی جمہوریہ ایران پشاورکے زیر اہتمام  قومی امن جرگہ برائے بین المذاہب ہم آہنگی خیبرپختونخواہ اور امامیہ کونسل برائے اتحاد بین المسلمین خیبرپختونخواہ کی اشتراک سے یوم القدس کی مناسبت پر امام خمینیؒ ہال میں "قدس  عالم اسلام کی ساکھ اور پہچان" کے عنوان سے ایک عظیم الشان کانفرنس، تصویری نمائش اور افطار کا انعقاد کیا گیا۔

کانفرنس میں قونصل جنرل اسلامی جمہوریہ ایران پشاور علی بنفشہ خواہ، ڈائریکٹر جنرل خانہ فرہنگ ایران پشاور  مہران اسکندریان،  وائس چیئرمین قومی وطن پارٹی خیبر پختونخوا نائب صدر ادارہ  تبلیغ الاسلام سیدفیاض علی شاہ، چیئرمین اسلامی نظریاتی کونسل پاکستان ڈاکٹر قبلہ ایاز، سابقہ ڈائریکٹر مطالعہ پاکستان سنٹر پشاور یونیورسٹی ڈاکٹر فخر الاسلام، شیعہ علماء کونسل کے مرکزی نائب صدر علامہ رمضان توقیر، مجلس وحدت المسلمین کے صوبائی صدر علامہ جہانزیب جعفری، چیئرمین دفاع پاکستان کونسل اور جامعہ دارالعلوم حقانیہ کے نائب مہتمم مولاناحامد الحق حقانیہ، سابقہ صوبائی وزیر اور مرکزی جنرل سیکرٹری عوامی نیشنل پارٹی میاں افتخار حسین شاہ ، مسلم لیگ ن کے نمائندہ صوبائی اسمبلی اختیار ولی خان،  صوبائی رہنما جمعیت اہل حدیث مولانا مقصود احمد سلفی، جمیعت علماء اسلام (ف )کے صوبائی رہنما اور چیئرمین قومی امن جرگہ اقبال شاہ حیدری، سیکرٹری جنرل امامیہ کونسل سید اظہر علی شاہ، جماعت اسلامی کے  صوبائی رہنماء محمدصدیق پراچہ اور دیگرمختلف مکاتب فکر کے علماء  اور مدرسوں کے مہتمم اور بڑی تعداد میں عاشقان بیت المقدس نے شرکت کی۔

مقررین نے منعقدہ کانفرنس سے خطاب کرتے ہوئے رہبر کبیر بانی انقلاب اسلامی ایران آیت اللہ العظمی امام خمینیؒ  کی بیت المقدس کی آزادی اور مظلوم مسلمانوں کے درد کو محسوس کرتے ہوئے عالمی سامراجی طاقتوں کے خلاف آواز بلند کرنے کےلئے  یوم القدس منانے کا اعلان پر اظہار خیال،بیت المقدس کی آزادی اور مظلوم فلسطینیوں سے اظہار یکجہتی اور سامراجی طاقتوں کے خلاف آواز بلند کرنے اور  بیت المقدس امت مسلمہ کی ذمہ داریاں پر خطبات فرمائے۔

مقررین نے کانفرنس سے خطاب کرتے ہوئے کہا کہ ایران سعودیہ تعلقات کی بحالی کے بعد ہر مسلمان اور انصاف پسند شخص کو توقع ہے کہ دونوں ممالک جہاں دیگر موضوعات پر مشترکہ پالیسیاں اپنائیں گے وہاں قبلہ اول کی آزادی فلسطینی ریاست کے قیام اور اسرائیلی سازشوں کے مقابلے کیلئے بھی مشترکہ لائحہ عمل اختیار کرینگے، اور  کہا کہ آج عالم اسلام کا بچہ بچہ قبلہ اول کی آزادی کی یاد دلاتا ہے اور مظلوم فلسطینی مسلمانوں  کیساتھ یکجہتی کا درس دیتا ہے۔ امریکہ اور اس کا بغل بچہ اسرائیل مسلمانوں کے خلاف سازشوں میں مصروف ہے لیکن یہ کبھی بھی اپنے ناپاک مقاصد میں کامیاب نہیں ہونگے اور قبلہ اول کو آزاد کرائینگے۔