اسپیکر و ڈپٹی اسپیکر قومی اسمبلی کا یوم القدس پر پیغام
اسپیکر قومی اسمبلی سردار ایاز صادق اور ڈپٹی اسپیکر سید غلام مصطفیٰ شاہ کا جمعتہ الوادع کو یوم القدس کے موقع پر فلسطینی عوام سے یکجہتی کا اظہار۔
اسلام آباد، 4 اپریل ، 2024:اسپیکر قومی اسمبلی سردار ایاز صادق نے جمعتہ الوادع کے موقع منائے جانے والے یوم القدس کے موقع پر فلسطینی عوام سے اظہار یکجہتی کرتے ہوئے کہا کہ پاکستان فلسطین کے بنیادی حق خودارادیت کو تسلیم کرتے ہوئے فلسطینی عوام کی جدو جہد آزادی اور 1967 سے پہلے والی سرحدوں کے مطابق آزاد فلسطینی ریاست کے قیام اور القدس الشریف کو اس کا دارالحکومت بنانے کی مکمل حمایت کرتا ہے ۔انہوں نے فلسطین میں اسرائیلی جارحیت و بربریت کی مذمت کرتے ہوئے کہا کہ گزشتہ کئی ماہ سے فلسطین میں اسرائیلی فورسز کی جانب سے جاری وحشیانہ بمباری سے 32 ہزار سے زائد فلسطینی شہید ہو چکے جن میں 11 ہزار معصوم فلسطینی بچے شامل ہیں۔انہوں نے کہا کہ اسرائیلی بمباری سے 77 ہزار سے زائد فلسطینی زخمی ہو چکے ہیں اور 38 ہزار سے زائد افراد لاپتہ ہیں۔انہوں نے کہا کہ فلسطین میں انسانی حقوق کی سنگین خلاف ورزیاں انسانی حقوق کی عالمی تنظیموں کے لیے لمحہ فکریہ ہے۔ان خیالات کا اظہار انہوں نے یوم القدس کے موقع پر اپنے جاری بیان میں کیا جو ہر سال جمعتہ الوادع کے موقع پر پوری مسلم دنیا میں جوش و جذبے سے منایا جاتا ہے۔
اسپیکر نے کہا کہ انسانی حقوق کی عالمی تنظیمیں غزہ میں انسانیت کو تحفظ فراہم کرنے میں ناکام نظر آئی ہیں۔انہوں نے کہ غزہ میں جاری انسانیت سوز مظالم پوری دنیا کیلئے گہری تشویش کا باعث بن رہے ہیں۔انہوں نے کہا کہ غزہ میں جاری اسرائیلی بربریت نے انسانیت کو شرمندہ کر رکھا ہے۔انہوں نے کہا کہ اب وقت آگیا ہے کہ اقوام متحدہ کو فلسطین کے حوالے سے سلامتی کونسل کی حالیہ قرارداد پر عمل درآمد کو یقینی بنانے ہوئے فلسطینی عوام کو ان کے بنیادی حق دینے کے لیے عملی اقدامات اٹھانے چاہیے۔انہوں نے کہا کہ اسرائیل عالمی جنگی جرائم کا مرتکب پایا گیا ہے۔اسپیکر نے کہا کہ پاکستان کی پارلیمان اور عوام مشکل وقت میں فلسطینی عوام کے شانہ بشانہ کھڑی ہے اور فلسطینی عوام کی اخلاقی اور سفارتی حمایت جاری رکھے گا اور تمام علاقائی و عالمی فورمز پر فلسطین کی جدو جہد آزادی کے حق میں آواز اٹھاتا رہے گا۔
ڈپٹی اسپیکر قومی اسمبلی سید غلام مصطفیٰ شاہ نے یوم القدس کے موقع پر جاری بیان میں کہا کہ فلسطین کی جدو جہد آزادی اور القدس الشریف کو فلسطین کا دارالحکومت ماننا ان کا بنیادی حق ہے جسے اقوام عالم کو تسلیم کرنا پڑے گا۔انہوں نے کہا کہ فلسطین میں جاری اسرائیلی بربریت کی جتنی بھی مذمت کی جائے کم ہے۔انہوں نے کہا کہ فلسطین میں جاری بمباری سے معصوم بچوں اور بزرگوں کا قتل عام عالمی انصاف کے منہ پر تماچہ ہے۔انہوں نے کہا کہ فلسطین میں اسرائیلی فورسز کی جانب سے جاری طاقت کا بے دریغ استعمال عالمی قوانین کی کھلم کھلا خلاف ورزی ہے۔انہوں نے کہا کہ یوم القدس کو جمعتہ الوادع کو پوری مسلم دنیا میں جوش و جذبے سے منایا جائے گا اور مظلوم فلسطین عوام سے مکمل یکجہتی کا اظہار کیا جائے گا۔
